يا سيدي يحسيني   خادم الك خليني

أنعه بمحرم وانتحب    يالما شربت من العذب    خادم الك خليني

1 – خليني احضر مجلسك وابجي على حالك

واذكر خواتك بالسبي واذكر عيالك

اشلون التراب بكربله ايعفر جمالك

باجر اذا صار الحشر  خلنه على بالك

جالك يعزي كل محب   يالما شربت من العذب    خادم الك خليني

2 – يا ظامي كلها ابمجلسك تشرب من الماي

خجلانه كلها شيعتك سامحها مولاي

هيه على حبك سيدي   تشرب لاجل هاي

وكلها تضل  مقصرة   ولو تنزف ادماي

بالنبلة قلبك منشعب    يالما شربت من العذب    خادم الك خليني

3 – خلينه ننعه ابمجلسك    نقرالك اشعار

وانوصف احوال الخيم   من شبت النار

على اطفالك شصار وجره   صار اللي ما صار

سحكوها بالخيل العده    حركوها  الاشرار

اطفالك انسلبت سلب    يالما شربت من العذب

شلون اليتامى تنسلب   يالما شربت من العذب     خادم الك خليني

4 – خليني انظر دمعتك    ساعات الوداع

لمن اجتلك عيلتك   وانته على الكاع

زينب اجتلك هايمه    محنية اضلاع

تفحص تشوفك عالثره   ومنها العقل ضاع

بدمك تشوفك منخضب      يالما شربت من العذب   خادم الك خليني

5 – لمن اجتلك شافتك   يمك اعاديك

ما صدكت لن الشمر متربع اعليك

صارت تجره وتسحبه    بس لا يأذيك

قالتله لا لا تذبحه   بالمصطفى اعليك

وبرمحه يلكزها بكعب      يالما شربت من العذب   خادم الك خليني